چہ میارجل ءِ ھالرسانی بنجاہ ءِ نیمگ ءَ : آپی ءُ تیاب دپی گوازی ماں مکران ءِ دست نہ جتگ ءُ زیبا ءُ براھداریں تیاب ءَ بودناک ءُ پُر سنچیں وردشکارانی پجارگ ءِ واست ءَ مزنین ءُ گھتریں جاگھے ءُ اِے گوازیانی میانجی ءَ یکے تیاب دپی پاد بولی اِنت کہ ھر چنت اِے سالانی میانجی ءَ ماں مکران ءِ زیبا ءُ براھداریں تیاب ءَ باز دیم روئی کتگ ئِے بلے اِے دیم روی اِیوک ءَ بس نہ اِنت ءُ اِے گوازی گیشتریں کمک ءُ مدتانی وازمندگ انت ۔
مکران ءِ سرجمیں تیاب دپ ءَ بے کَچ ءُ کساسیں ماسِھے ھست اِنت کہ گوں کم تریں امکانات ءُ اوزار ءُ سامان ءُ ھرچ ءُ درچ ءَ شرتریں سِنچ ءُ بودّاں ودی کت کن اِیں پرچا کہ چھبار ءِ چنت سالی تیاب دپی گوازی ءُ گوازی کنوکانی کرد ءُ کارپد ءَ پدر اِنت کہ اِد ءِ ورنا ءُ وردشکار ماں اِے شھرستان ءَ ءُ کنرک ءُ جاسک ءُ دشتیاری ءَ ءُ مکران ءِ تیاب ءِ پھنات ءَ بودناکیں گوازی کنوک در کیت ۔
ماں اِے میانجی ءَ ایران ءِ ملی پوشیں گوازی کنوک واجہ سئید پیرامون ءِ نام ءَ گپت کن اِیں کہ چھبار ءِ میزریں ھند ءِ نندوک ءُ گوازی کنوک اِنت ءُ اِیشی ءَ ماں ایران ءِ تیاب دپی پادبولی گوازیاں ماں لیگ ءِ برتر ءَ پیش داشت کہ چھبار ءُ مکران ءَ بودناکیں گوازی گریں گوازی کنوک ماں آپی ءُ تیابی گوازیاں ھست اِنت ءُ پہ ھمیشیگی ءُ ھمے مول ءُ مراد ءَ چہ نزیک ءَ لھتیں چہ چھبار ءِ تجربہ داریں گوازی کنوک ءُ وردشکارانی پلیں پتر ءَ شتگ ءُ نشت اِیں کہ شمئے چم ءُ دیدگانی دیم ءَ گْوز اِیت.